પ્રથમ વખત H3N8 બર્ડ ફ્લૂનો ચેપ માનવની અંદર જોવા મળ્યો છે. મળતી માહિતી મુજબ, ચીનના હેનાન પ્રાંતમાં બર્ડ ફ્લૂના H3N8 સ્ટ્રેનથી પ્રથમ માનવ સંક્રમણ નોંધાયું છે. મંગળવારે મીડિયા રિપોર્ટમાંથી આ માહિતી મળી છે. તે જ સમયે, ચીનના નેશનલ હેલ્થ કમિશન (NHC) દ્વારા જારી કરવામાં આવેલા નિવેદનમાં આ બાબતની જાહેરાત કરવામાં આવી હતી. પરંતુ સાથે જ એવું કહેવામાં આવ્યું હતું કે લોકોમાં તેને ફેલાવવાનું જોખમ ઓછું છે. તેથી ડરવાનું કંઈ નથી.
H3N8 વિશે વધુ માહિતી આપતા ચીનના નેશનલ હેલ્થ કમિશને કહ્યું કે ચાર વર્ષનો એક છોકરો તેનાથી પીડિત હતો. NHC અનુસાર, બાળક તાવ સહિત અનેક લક્ષણો વિકસાવ્યા બાદ H3N8 વાયરસથી સંક્રમિત જણાયો હતો. રાહતની વાત એ છે કે તેમના સંપર્કમાં આવનાર કોઈપણ વ્યક્તિ આ વાયરસની ઝપેટમાં આવ્યો નથી. NHC અનુસાર, બાળક તેના ઘરમાં પાળેલા ચિકન અને કાગડાના સંપર્કમાં આવ્યો હતો. જે બાદ તેનામાં તાવ સહિતના ઘણા લક્ષણો જોવા મળ્યા અને તપાસમાં તે સંક્રમિત જણાયો.
હેલ્થ કમિશને કહ્યું કે H3N8 વેરિયન્ટ વિશ્વમાં સૌથી પહેલા ઘોડા, કૂતરા અને પક્ષીઓમાં જોવા મળ્યું છે. જો કે, H3N8 નો કોઈ માનવીય કેસ નોંધાયો નથી. એટલે કે આ વિશ્વનો પ્રથમ માનવીય કેસ છે. વેરિઅન્ટમાં હજુ સુધી મનુષ્યોને અસરકારક રીતે સંક્રમિત કરવાની ક્ષમતા નથી. આવી સ્થિતિમાં, મોટા પાયે રોગચાળાનું જોખમ ઓછું છે.